Goðsagnir Arsenal og Manchester United, Martin Keown og Rio Ferdinand, tókust á eftir tap fyrrnefnda liðsins gegn Manchester City í gær.

City vann 4-1 og er komið í góða stöðu í titilbaráttunni við Arsenal.

„Arsenal er að byggja orðspor sitt upp á nýtt. Ég kaupi ekki að það þýði að þeir séu að klúðra einhverju. Þetta lið mun vinna eitthvað. Ég hef engar áhyggjur af öðru,“ sagði Keown eftir leik.

Ferdinand sagði að ekki væri hægt að líta á Arsenal sem sigurvegara strax þar sem liðið hefur ekki unnið titil síðan 2020 og ekki unnið Englandsmeistaratitilinn síðan 2004.

„Stjórinn hefur komið með sigurmenningu inn í félagið. Þessir leikmenn eru sigurvegarar núna,“ sagði Keown þá.

Ferdinand var allt annað en sammála. „Hvernig? Þeir hafa ekki unnið neitt.“

Keown stóð þó fastur á sínu. „Sjáðu hvað þeir hafa unnið marga leiki. Þeir voru linir. Nú er erfitt að mæta þeim.“

„Menningin innan félagsins hefur breyst og það hefur verið gert mjög vel. Það er samt of langt gengið að kalla þá sigurvegara,“ sagði Ferdinand að lokum.