Oliver Heiðarsson er búinn að skrifa undir hjá ÍBV. Þetta herma öruggar heimildir 433.is.

Það var sagt frá því í gær að Oliver væri við það að ganga í raðir ÍBV frá FH.

Viðræður hafa átt sér stað á milli ÍBV og FH og náðist samkomulag að lokum.

Oliver, sem er fæddur árið 2001, skoraði fimm mörk í 31 leik fyrir FH í deild og bikar á síðustu leiktíð.

Hann getur spilað sem kantmaður og framherji. Kappinn hefur komið við sögu í tveimur leikjum í Bestu deild karla í sumar, báðum sem varamaður. Hann var ónotaður varamaður þegar FH tapaði gegn Fylki í Árbænum í síðustu umferð.

Oliver er sonur Heiðars Helgusonar sem átti afar farsælan feril sem atvinnu og landsliðsmaður í knattspyrnu. Oliver ólst upp á Englandi en lék með Þrótti áður en hann gekk í raðir FH fyrir tímabilið 2021.

ÍBV er með þrjú stig eftir þrjár umferðir í Bestu deildinni en liðið vann öflugan sigur á Íslandsmeisturum Breiðabliks á sunnudag.