Helgi Sigurðsson, þjálfari Grindavíkur, er sáttur með að hafa dregist gegn sínum gömlu félögum í Val í 16-liða úrslitum Mjólkurbikarsins. Hans menn ætla sér að sigra leikinn.

„Það er bara frábært. Þetta er það sem ég óskaði mér. Það hefði verið gaman að fá heimaleik en úr því sem komið er verður þetta bara frábær leikur. Við ætlum okkur að vinna leikinn og fara áfram. Við teljum okkur geta það,“ segir Helgi í samtali við 433.is í dag, en hann var aðstoðarþjálfari Vals síðasta sumar.

„Við gerðum jafntefli við þá í Lengjubikarnum og nú ætlum við okkur sigur.“

Helgi og Grindvíkingar hafa talað opinskátt um það að liðið ætli sér upp úr Lengjudeildinni og í þá efstu á komandi leiktíð.

„Þetta er búið að vera langt og strangt undirbúningstímabil og nú sér fyrir endann á því. Mönnum hlakkar mikið til að spila alvöru fótboltaleiki.

Allir leikirnir verða hörkuleikir og ef þú ert ekki með hausinn rétt skrúfaðan á lendir þú í vandræðum. Það eru mörg lið sem ætla sér stóra hluti í sumar.“

Ítarlega er rætt við Helga hér að neðan.