Það er óvíst hver verður næsti stjóri West Ham. Liðið gæti fengið stjóra úr óvæntri átt.
West Ham hefur verið í fallbaráttu og tómum vandræðum á leiktíðinni en er þó komið í undanúrslit Sambandsdeildarinnar.
Stjórinn David Moyes er valtur í sessi og ekki ólíklegt að skipt verði um mann í brúnni í sumar.
Sjálfur er Moyes ákveðinn í að vera áfram.
Enska blaðið The Sun heldur því hins vegar fram að Xabi Alonso komi sterklega til greina sem næsti stjóri af háttsettum mönnum hjá West Ham.
Spænska goðsögnin, sem gerði garðinn frægan hjá Liverpool, Real Madrid og Bayern Munchen, hefur vakið mikla athygli fyrir starf sitt hjá Bayer Leverkusen.
Hinn 41 árs gamli Alonso tók við Leverkusen í október og hefur hann snúið gengi liðsins við. Hann tók það úr fallbaráttu í Evrópubaráttu og er kominn með liðið í undanúrslit Evrópudeildarinnar.
Alonso gæti verið verðlaunaður með stjórastarfi í ensku úrvalsdeildinni í sumar ef kallið kemur frá West Ham.
