Sparkspekingurinn Stan Collymore er handviss um hvar Jude Bellingham mun enda í sumar og segir hann svarið liggja augum uppi.

Bellingham er aðeins 19 ára gamall og einn eftirsóttasti leikmaður heims. Borussia Dortmund er opið fyrir því að selja leikmanninn í sumar á 130 milljónir punda.

Enski miðjumaðurinn hefur til að mynda verið orðaður við Manchester City, Real Madrid og Liverpool, en síðastnefnda félagið hefur þó dregið sig úr kapphlaupinu.

„Ég held að hann endi hjá Manchester City og fari svo eftir fjögur til fimm ár, ásamt Erling Braut Haaland, til Real Madrid,“ segir Collymore.

„City er ótrúlega gott þegar kemur að því að verð sé uppgefið eða að um klásúlu sé að ræða. Þeir borga verðið og greiða leikmönnum svo himinnhá laun.

Ef þú ert Bellingham, af hverju myndir þú ekki vilja fara á Etihad? Sérstaklega þegar Pep Guardiola er þarna og getur unnið tvöfalt, jafnvel þrefalt. Hvað leikmanninn varðar finnst mér valið augljóst.“