Íslenska landsliðskonan í knattspyrnu, Svava Rós Guðmundsdóttir, gekk í raðir NJ/NY Gotham í Bandaríkjunum á dögunum eftir að hafa verið á mála hjá norska félaginu Brann. Í aðdraganda félagsskiptanna hafði Svava verið orðuð við enska félagið West Ham Untied og fór af stað orðrómur tengdur því sem var ekki á rökum reistur.
Í samtali við Fréttablaðið leysir Svava frá skjóðunni en á dögunum kom upp orðrómur um að Svava hefði fallið á læknisskoðun hjá West Ham en hún segir það ekki rétt.
„Við fórum út og þegar við komum á svæðið var samningurinn ekki eins og búið var að semja um áður en ég fór út,“ segir Svava Rós í samtali við Fréttablaðið. „Það var búið að breyta samningnum um það leyti sem Gotham kom aftur inn í myndina og þá afþakkaði ég boð West Ham þótt samningurinn stæði enn til boða.“
Juan Carlos Amorós er þjálfari Gotham en sá þjálfari hefur áður sýnt áhuga á að fá Svövu til liðs við lið sitt.
„Þjálfarinn á stóran þátt í þessu, enda hefur hann hefur reynt áður að fá mig til sín. Ég er búin að tala mikið við hann og er hrifin af því hvernig hann vill spila fótbolta og var í miklum samskiptum við hann. Ég er mjög spennt að vinna með honum enda gerði hann frábæra hluti með Houston Dash seinni hluta síðasta tímabils.“
