Cristiano Ron­aldo, leik­maður Al-Nassr í Sádi-Arabíu og fyrrum leik­maður Manchester United hefur boðið fjórum fyrrum liðs­fé­lögum sínum í Manchester­borg til Portúgal eða Sádi-Arabíu í eins konar kveðju­partý. Það er The Sun sem greinir frá.

Ron­aldo fór frá Manchester United með hvelli þar sem samningi hans við fé­lagið var rift í kjöl­far við­tals sem hann veitti breska fjöl­miðla­manninum Pi­ers Morgan. Við­talið vakti mikla at­hygli og skapaði mikinn glund­roða en í því sagði Ron­aldo farir sínar ekki sléttar hjá Manchester United eins og frægt er orðið.

Samningi Ron­aldo við Manchester United var rift á tíma­punkti þar sem leik­maðurinn var á fullu í undir­búningi með portúgalska lands­liðinu fyrir HM í Katar undir lok síðasta árs. Þar af leiðandi tókst honum ekki að kveðja liðs­fé­laga sína hjá Manchester United.

Til þess að reyna bæta upp fyrir það hefur Ron­aldo nú boðið fjórum fyrrum liðs­fé­lögum sínum hjá Manchester United að hita sig, annað hvort í heima­landinu Portúgal eða í Sádi-Arabíu þar sem hann dvelur nú.

Þetta eru þeir Harry Maguire, Bruno Fernandes, Ca­semiro og Rap­hael Vara­ne. Það er heimildar­maður The Sun, sem sagður er vel tengdur Manchester United, sem greinir frá þessu.

„Það eru enn leik­menn í leik­manna­hópi Manchester United sem bera ekkert nema virðingu fyrir Ron­aldo og þeim þótti leiðin­legt að sjá hvernig dvöl hans hjá fé­laginu lauk vegna þess að þeim tókst ekki að kveðja hann.

Hann fór ný­verið úr What­sApp hópi leik­manna Manchester United en lofaði að vera á­fram í sam­bandi og bauð þeim á heimili sitt í Lisabon eða Sádi-Arabíu.“

Allur kostnaður við ferðina verður greiddur af portúgölsku knatt­spyrnu­goð­sögninni.