Manchester United ætti að hleypa Cristiano Ronaldo burt í sumar en hann hefur ítrekað reynt að komast annað þar sem Man Utd er ekki í Meistaradeildinni.

Þetta segir Wayne Rooney, fyrrum samherji Ronaldo hjá Man Utd, en hann vill sjá félagið horfa til næstu 3-4 ára frekar en núverandi tímabils.

Ef Ronaldo vill fara ætti hann að fá ósk sína uppfyllta að sögn Rooney sem þekkir Portúgalann mjög vel eftir dvöl saman í Manchester.

,,Að mínu mati ætti United að leyfa Cristiano Ronaldo að fara. Þetta snýst ekki um að hann geti ekki spilað í liði Erik ten Hag, Ronny mun alltaf skora í hvaða liði sem er,“ sagði Rooney.

,,Ég tel þó að United sé ekki tilbúið að berjast um titilinn núna og þeir þurfa að byggja lið sem getur unnið deildina á næstu þremur eða fjórum árum.“

,,Ef fréttirnar eru réttar og Cristiano vill fara þá ætti félagið að hleypa honum burt og fá inn níu sem verður þarna næstu þrjú eða fjögur árin til að hjálpa í uppbyggingunni.“