Aðeins einn af nýju leikmönnum Tottenham mun fá að spila reglulega í byrjunarliðinu í vetur að sögn Jamie Carragher, fyrrum leikmanns Liverpool.

Yves Bissouma er sá leikmaður en hann kom frá Brighton í sumar og er einn af sex leikmönnum til að koma til Tottenham í glugganum.

Carragher telur ekki að Richarlison, Ivan Perisic, Clement Lenglet, Djed Spence og Fraser Forster muni spila stórt hlutverk í vetur.

Richarlison er sá leikmaður sem gerir kannski mesta tilkallið en hann kostaði töluverða upphæð og kom frá Everton.

Carragher telur að Tottenham muni notast við sama byrjunarlið og á síðustu leiktíð en að Bissouma fái pláss á miðjunni.

,,Ég er óviss hversu mikið þessi kaup styrkja byrjunarliðið. Bissouma er gæðaleikmaður og ég býst við að hann festi sig í sessi,“ sagði Carragher.

,,Fyrir utan það þá erum við að tala um sama byrjunarlið og við sáum seinni hluta síðasta tímabils.„