Liverpool er nú orðið vinsælasta félagið í ensku úrvalsdeildinni á meðal stuðningsmanna í Bandaríkjunum.
Þetta kemur fram í nýrri könnun Morning Consult.
Manchester United hafði áður verið vinsælasta félagið en Liverpool tekur nú fram úr Rauðu djöflunum.
Liverpool hefur átt mun betra gengi að fagna en United undanfarin ár. Liðið varð Englandsmeistari árið 2020 og Evrópumeistari árið áður.
Þá hefur Liverpool barist við Manchester City um Englandsmeistaratitilinn undanfarin ár.
Á sama tíma hefur United tekið skref til baka eftir brotthvarf Sir Alex Ferguson og ekki orðið Englandsmeistari síðan 2013. Það hefur án efa mikið að segja í vinsældarkönnuninni sem nefnd var hér ofar.