Brenton Muhammad markvörður Vestra sneri aftur á völlinn í kvöld og spilar nú með liðinu gegn Selfoss í Lengjudeild karla.
Markvörðurinn knái hefur verið í herbúðum Vestra frá árinu 2018 en hann kom til Íslands árið 2015 og hafði leikið með Ægi og Tindastól áður en hann fór í Vestra.
Brenton er að snúa aftur á völlinn eftir að hafa verið fluttur á sjúkrahús um miðjan maí eins og 433 vakti athygli á.
„Brenton fékk lungnabólgu, það fór að stækka í honum hjartað,“sagði Samúel Sigurjón Samúelsson formaður meistaraflokksráðs hjá Vestra í samtali við 433.is í maí.
„Hann var sendur suður til Reykjavíkur á sjúkrahús og er þar ennþá. Hann er allur að koma til en það er verið að fylgja honum eftir. Hann er ekkert að spila fótbolta á næstunni.“
Brenton fór að finna fyrir slappleika og ákvað að láta skoða málið. „Hann var slappur fyrir æfingaleik á móti ÍA sem var viku fyrir mót. Á þriðjudegi var hann enn slappur og lét þá skoða sig, þetta var þá niðurstaðan.“