Staða Jóns Þórs Haukssonar sem þjálfari karlaliðs ÍA er ekki í hættu, þrátt fyrir slappt gengi liðsins. Þetta segir Eggert Ingólfur Herbertsson, formaður knattspyrnudeildar félagsins, í samtali við 433.is.
ÍA er í neðsta sæti Bestu deildar karla með átta stig, þremur stigum frá öruggu sæti.
„Við erum ekki í toppmálum. Við verðum bara að koma okkur út úr því,“ segir Eggert.
Jón Þór er hins vegar öruggur í starfi. „Við Skagamenn erum ekkert í því að reka þjálfara.“
Ekki bætir úr skák fyrir ÍA að næstu leikir liðsins eru gegn afar sterkum andstæðingum.
Liðið heimsækir Breiðablik í næsta leik á þriðjudag. Þar á eftir fá Skagamenn Val í heimsókn og síðan fara þeir í heimsókn til KA, sem er í þriðja sæti deildarinnar.