Rúnar Kristinsson, þjálfari KR, ræddi við Stöð 2 Sport í kvöld eftir leik liðsins við Val í Bestu deild karla.
Rúnar vildi fá meira en eitt stig úr leik kvöldsins og segir að jafntefli hafi ekki verið sanngjörn niðurstaða að lokum.
Leiknum lauk með 3-3 jafntefli en KR þurfti að gera töluverðar breytingar í kvöld vegna meiðsla leikmanna.
,,Nei. Við þurftum að skora fleiri mörk en Valur,“ sagði Rúnar um hvort jafnteflið gæfi rétta mynd af leiknum.
,,Við höfðum getað skorað annað mark í fyrri hálfleik, við sköpuðum mikið og áttum dauðafæri og Fredrik Schram ver stórglæsilega frá Halli Hanssyni. Við þurfum að nýta færin betur og koma okkur í þægilegri stöðu. Við létum mark þeirra undir lok fyrri hálfleiks ekkert á okkur fá.“
,,Ég er ótrúlega stoltur af liðinu, við þurfum að setja Þorstein Má í bakvörð, hann hefur sennilega aldrei spilað það áður og þurftum að færa Grétar af miðjunni og setja Pálma inn og Kennie útaf, það er dálítið mikið fyrir okkur. Það riðlaði aðeins okkar leik en menn komu inn og stóðu sig ofboðslega vel.“
,,Þetta var opinn leikur, tvö lið sem vildu ná í sigur. Þetta var fram og til baka og fullt af flottum mörkum í þessu.“