Það hefur ekkert gengið upp hjá FH á þessari leiktíð í Bestu deild karla. Liðið er í níunda sæti deildarinnar með ellefu stig eftir fjórtán leiki, stigi fyrir ofan fallsæti.
FH geriði markalaust jafntefli við Breiðablik í gær, þrátt fyrir að vera manni fleiri nær allan leikinn.
Eiður Smári Guðjohnsen, þjálfari FH, sagði í viðtali við Stöð 2 Sport eftir leik að það væri góður andi í leikmannahópnum, þrátt fyrir slappt gengi.
„Það er erfitt að vera með góðan anda þegar þú vinnur ekki fótboltaleiki,“ sagði Guðmundur Benediktsson í Stúkunni á Stöð 2 Sport eftir leik FH í gær.
Albert Brynjar Ingason tók í svipaðan streng. „Þetta er þungt og maður setur bara meiri kröfur á þetta lið. Einum fleiri í 80 mínútur. Þeir eiga ekki að vera í fallbaráttu með þennan hóp.“
„Það er ekki hægt að gefa þeim neinn afslátt eftir þennan leik. Þetta var gullið tækifæri til að vinna toppliðið í deildinni, sýna smá karakter eftir svona langa hrinu af vonbrigðum. Mér fannst þeir bara falla á prófinu algjörlega,“ sagði Albert Brynjar.