„Við hefðum viljað vinna leikinn. Mér fannst við fá betri færi í leiknum,“ sagði Ísak Bergmann Jóhannesson eftir 1-1 jafntefli Íslands gegn Albaníu í Þjóðadeildinni í kvöld.
„Það er kafli í fyrri hálfleik þar sem þeir stjórna leiknum en við komum út sterkir í seinni. Jón Dagur skorar þetta mark og mér fannst við betri í seinni.“
Í markinu sem Ísland fékk á sig mátti setja spurningamerki við varnarleik, og jafnvel markvörslu, liðsins. „Mér fannst við hafa getað leyst þetta betur vinstra megin, ég, Jón Dagur og Davíð. Ég hefði getað stigið inn í manninn og ekki hleypt honum áfram,“ sagði Ísak.
Það var langt í frá fullur völlur í dag en Ísak telur að samband liðsins við stuðningsmenn sé að styrkjast. „Ég er ótrúlega ánægður með þá sem mættu. Þó það væru ekki margir. Við erum að reyna að byggja upp tengsl við áhorfendur og allir sem mættu voru stórkostlegir.“
„Mér finnst þessi Þjóðadeild byrja ágætlega en við erum enn ósigraðir. Það er styrkleikamerki.“