Liverpool gerði risastór mistök í sumar með því að hleypa Sadio Mane til Bayern Munchen. Þetta segir fyrrum enski landsliðsmaðurinn, Paul Merson.
Liverpool reyndi að framlengja samning Mane sem átti að renna út á næsta ári en var aldrei reiðubúið að gefa honum þau laun sem beðið var um.
Mane hefur því skrifað undir samning við Bayern í Þýskalandi eftir að hafa spilað með Liverpool í sex ár.
Merson telur að þetta séu stór mistök af hálfu Liverpool og að liðið gæti tekið eftir þeim strax í byrjun tímabils.
,,Ég get bara ekki skilið af hverju þeir leyfðu honum að fara til Bayern. Ef þú horfir á tölfræðina, hann skorar ekki þriðja, fjórða eða fimmta markið fyrir Liverpool – hans mörk eru að vinna leiki fyrir Liverpool,“ sagði Merson.
,,Sérstaklega á þessu verði, þetta er eitthvað sem getur komið í bakið á Liverpool. Ég held að fólk sé að vanmeta hversu stöðugur hann hefur verið síðan hann kom frá Southampton 2016. Kannski átta þeir sig á þessu þegar tímabilið byrjar.“
,,Hann vinnur fyrir liðið í hverjum einasta leik og gerir það sem þarf að gera en hversu fjölhæfur hann er haefur hentað Jurgen Klopp ótrúlega vel.“