Romelu Lukaku skaut sjálfan sig í fótinn á síðustu leiktíð sem varð til þess að leikmaðurinn mun yfirgefa Chelsea í sumar.
Þetta segir skoska goðsögnin Ally McCoist en Lukaku gekk aftur í raðir Chelsea frá Inter Milan í fyrra og er nú á förum þangað aftur.
Viðtal við Lukaku birtist á miðju síðasta tímabili þar sem hann sagðist vilja snúa aftur til Inter stuttu eftir að Chelsea hafði borgað risastóra upphæð fyrir Belgann.
,,Ég tel að hann þurfi núna að fara, ég var að vona að það væri leið til baka fyrir hann,“ sagði McCoist.
,,Ég tel að viðtalið hafi valdið þessu ef ég á að vera hreinskilinn. Ég vonaðist eftir því að hann myndi berjast áfram um sitt sæti og vinna stuðningsmennina og stjórann á sitt band.“
,,Ég er sannfærður um að það verði ekki raunin núna sem er svekkjandi. Það er best fyrir báða aðila að koma þessu í gegn fyrr frekar en seinna.“
,,Hann skaut sjálfan sig í fótinn með þessu viðtali. Ég veit hversu illa þetta leit út og hversu slæmt þetta var en ég vonaðist alltaf eftir því að það væri leið til að snúa aftur.“