Eiður Smári Guðjohnsen þjálfaði FH í sínum fyrsta leik í kvöld eftir að hafa tekið aftur við liðinu á dögunum.
Eiður sá sína menn gera jafntefli í fyrsta leik en FH sótti eitt stig á Akranes gegn ÍA.
Eftir leik ræddi Eiður við Stöð 2 Sport og var hann heilt yfir nokkuð sáttur með frammistöðuna og úrslitin.
,,Mér fannst við byrja leikinn nokkuð vel og svo vantaði aðeins meiri áreiðni og gæði inni á milli. Þetta voru ekki auðveldar aðstæður í dag heldur en mér fannst við sýna mikla þolinmæði því það var ekki auðvelt að brjóta Skagaliðið niður,“ sagði Eiður.
,,Mér fannst jafntefli sanngjarnt. Vinnusemin var upp á tíu, við sýndum karakter með að koma til baka og sýndum trú og þolinmæði og uppskárum út frá því.“
,,Það kemur enginn með töfrasprota hér inn, ég er búinn að vera hér í tvo daga og það sem við vildum sjá var liðsheild og mér fannst við sjá það.“
Eiður bætti svo við að Gunnar Nielsen ætti að snúa aftur eftir næstu helgi en markmaðurinn hefur verið fjarverandi.