Víkingur Reykjavík mætir Levadia Tallin frá Eistlandi á þriðjudaginn í undanúrslitum forkeppni um að komast í undankeppni Meistaradeildar Evrópu. La Fiorita og Inter Club d‘Escaldes taka einnig þátt í forkeppninni og mætast í hinni undanúrslitaviðureigninni. Sá leikur, sem og úrslitaleikurinn þremur dögum síðar, fer fram í Víkinni.
Það er óhætt að segja að fyrir þetta fjögurra liða mót verða Víkingar og Levadia að teljast sigurstranglegustu liðin. Arnar Gunnlaugsson, þjálfari Víkinga, kveðst þó sáttur með að fá Eistanna strax í undanúrslitunum. „Við erum sigurstranglegust, þessi tvö lið. Og það er fínt að fá hann bara á undan. Án þess að vera í einhverju vanmati myndi maður fyrir fram halda að Víkingur og Levadia séu bestu liðin af þessum fjórum,“ sagði Arnar í samtali við Fréttablaðið.
Arnar segir jafnframt að fólk þurfi að átta sig á því að Levadia verði virkilega krefjandi andstæðingur. „Þetta er allt annar fótbolti en við fáum að venjast hér heima. Öll smáatriði þurfa að vera 100 prósent á hreinu. Og við erum að mæta liði sem er sterkt. Flora Tallin komst í riðlakeppni Sambandsdeildarinnar í fyrra og þeir unnu ekki einu sinni deildina, heldur þetta lið (Levadia). Þannig að þetta eru tvö langbestu liðin í Eistlandi. Þetta verður hörkuleikur. Heimavöllurinn mun væntanlega hjálpa okkur, vonandi. Vonandi verður bara fjölmenni og stemning á þeim leik. En þetta er bara 50/50 leikur.“
Arnar og hans teymi hafa horft á þó nokkra leiki með Levadia. „Þessi deild (efsta deild Eistlands) er ekki sterk. Við erum búnir að horfa á nokkra leiki og suma er bara tilgangslaust að horfa á, það eru svo miklir yfirburðir. En leikirnir á milli Flora Tallin og Levadia eru hörkuleikir. Levadia vann deildina en Flora var í riðlakeppni í Sambandsdeildinni. Ég held að fólk átti sig ekki alveg á hversu mikið afrek það er. Þannig að það er ekkert vanmat eða neitt þannig í gangi hjá okkur. Þú kemst upp með mistök í Bestu deildinni, inn á milli. En í Evrópukeppninni, mistök og þú ert úr leik.“
Nánar er rætt við Arnar um komandi Evrópuverkefni í Fréttablaðinu.
