Úrslitaleikurinn í Meistaradeildinni var fyrirferðamikill í Íþróttavikunni með Benna Bó sem er á dagskrá Hringbraut á föstudögum. Þar mætast Real Madrid og Liverpool í París. Hjörvar Hafliðason, doktor Football og íþróttastjóri Viaplay og Jóhann Már Helgason, íþróttaskríbent og sérfræðingur í þættinum sátu í settinu með Benedikt Bóas.
Úrslitaleikurinn er sýndur á Viaplay og verður mikið húllumhæ í kringum leikinn en útsending hefst um 90 mínútum fyrir upphafsspark og munu Hörður Magnússon og Heimir Hallgrímsson lýsa. Kjartan Henry kíkir í settið með Kára Árnasyni og Rúrik Gíslasyni. „Við byrjum hálf sex og við hefðum þess vegna byrjað klukkan fjögur því það er af nægu að taka. Endalaust efni. Kjartan kíkir inn og velur uppáhalds mörkin sín frá Benzema og Salah. Svo er þetta þannig að við höldum áfram til 18.42 þá förum við á tónleika með UEFA þar sem Camila Cabello treður upp.“
Jóhann sagði eitt sinn í Doktornum að UEFA gætu verið að skoða að breyta úrslitaleiknum og gert hann í anda Super Bowl og haft jafnvel Meistardeildarviku. „Ef við tölum bara um úrslitaleikinn. Ég skil að þetta fari í taugarnar á einhverjum þetta tónlistaratriði. Ég er alveg pínu af gamla skólanum og vil fá upphitun og leikmenn labba inn á.
Ég vona að þetta verði ekki Meistaradeild Evrópu í framtíðinni að það verði gert í anda Superbowl, ég vona að við sjáum ekki hálftíma hálfleik því þá ertu búinn að breyta fótboltaleiknum. Ég vona að þetta verði ekki þróunin en ef peningar eru að fara stjórna ferðinni þá er allt upp á borðum.“
Hjörvar bendir að Meistaradeildin sé alltaf að stækka og bráðum verði liðin 40 í deildinni. „Þetta er alltaf að stækka og það er óumflýjanlegt að það verði ekki einhverskonar Meistaradeildarvika þar sem unglingaleikurinn verði á þriðjudegi, fimmtudeginum verði kvennaleikurinn og á föstudeginum tónleikar og hátíð. Þeir munu finna leiðir. Meistaradeildin verður bandaríkjavædd meira og meira hvort sem okkur líkar betur að verr. Markaðsöflin munu ráða þessu og þetta verður gert að hátíð. Week of football. “
Jóhann benti á að það sé stutt síðan úrslitaleikurinn var á miðvikudegi. „Það var 2009 þannig það er ekki svo langt síðan.“
