Steve McClaren ræddi um endurkomu sína til Manchester United í hlaðvarpsþætti sonar síns, Josh McClaren, í dag.
McClaren verður í þjálfarateymi Hollendingsins Erik ten Hag á næstu leiktíð og er það í annað sinn sem hann gegnir störfum hjá United en McClaren var aðstoðarmaður Sir Alex Ferguson á árunum 1999-2001.
Næst tók hann við sem knattspyrnustjóri Middlesbrough og stýrði liðinu til sigurs í enska deildarbikarnum árið 2004 og tveimur árum síðar kom hann Boro í úrslit Evrópudeildarinnar áður en hann tók við stjórnvölunum hjá enska landsliðinu. Við tók þjálfaraferill í Hollandi, Englandi og Þýskalandi.
„Um leið og maður kemur til Man United þá er eins og maður sé með það í blóðinu. Þetta er eitt af liðunum sem maður heldur með,“ sagði McClaren. „Það hefur auðvitað gengið upp og ofan en við höfum alltaf haft dálæti á Manchester United.“
McClaren ræddi einnig um stjórnarhætti Erik ten Hag og hvað þjálfarateymið hefur verið að fást við undanfarna daga. „Síðustu sjö dagar hafa sýnt hvað hann hefur næmt auga fyrir smáatriðum og hvað hann vill afreka.“
„Og það er síðan hann vann titilinn með Ajax, hann er strax kominn í annað, dálítið eins og Sir Alex Ferguson gerði á sínum tíma. En við viljum bara styðja við bakið á Erik og gera hann sigursælan, ef hann verður það, þá gildir það sama um liðið,“ sagði McClaren.