Enska úrvalsdeildin hefur heimilað 4,25 milljarða punda kaup fjárfestahóps leiddan af viðskiptajöfrinum Todd Boehly á enska knattspyrnufélaginu Chelsea. BBC segir frá.
Deildin segir að fjárfestahópurinn hafi staðist eigenda- og stjórnendapróf.
Félagið var sett á sölu áður en Roman Abramovich var beittur viðskiptaþvingunum í kjölfar innrásar Rússa í Úkraínu vegna tengsla við Vladímír Pútín Rússlandsforseta.
Bresk stjórnvöld eiga eftir að veita söluleyfi fyrir kaupunum og enn á eftir að fullklára alla samninga. Breska ríkisstjórnin vill ekki að Abramovich hagnist af sölunni og samkvæmt heimildum BBC ríkir bjartsýni um að samningar verði kláraðir á fimmtudagskvöld.
„Við trúum því að nú verði allir reiðubúnir að veita nauðsynlegt leyfi,“ segir einn heimildarmaður. „Eina fyrirstaðan kemur niður á síðustu tæknilegu atriðunum sem er verið að ræða við klúbbinn.“