Kjartan Atli Kjartansson var gestur í íþróttavikunni með Benna Bó sem er á dagskrár Hringbrautar alla föstudaga ásamt Herði Snævari Jónssyni, íþróttastjóra Torgs. Kjartan er umsjónarmaður Körfuboltakvölds á Stöð2 sport en þeir félagar hafa haft næg verkefni undanfarnar vikur og skilað sínu heim í stofur landsmanna með prýði.

Ein af fréttum vikunnar var hjartastopp sem Emil Pálsson fór í en þeir félagar voru sammála að allir haldi mikið með bata Emils. „Þetta var fúlt. Við vorum með hann í viðtali í Fréttablaðinu ekki alls fyrir löngu þar sem læknar voru búnir að gefa grænt ljós að fara fulla ferð áfram. Þetta eru hræðileg tíðindi fyrir hann persónulega og væntanlega verður þetta til þess að hann spili ekki fótbolta aftur,“ sagði Hörður.

Kjartan Atli sagði frá því þegar hann heyrði að Emil hefði farið í hjartastopp. „Ég var staddur inn í íþróttahúsi á yngri flokka leik í körfubolta þegar þetta gerðist á sínum tíma og allir halda með honum. Maður fær sting í magann fyrir hans hönd. En þetta setur trúlega hlutina fyrir hann í samhengi.“

„Ætli hann velji ekki frekar lífið en fótboltann,“ sagði umsjónarmaðurinn Benedikt Bóas og sendu þeir félagar batakveðjur á Emil.