Vanda Sigurgeirsdóttir var endurkjörin formaður KSÍ um liðna helgi með miklum yfirburðum. Hún er gesthr í Mannamáli á Hringbraut klukkan 19.00 í kvöld þar sem hún fer yfir æviskeið sitt í einlægu viðtali við Sigmund Erni Rúnarsson.
„Mér þykir vænt um þessar rætur, mikið af góðu fólki. Það er gott fólk á öllu landinu, það er mín reynsla. Svo er ég með tilfinningarnar í Skagafirðinum, ég hef oft sagt að ég er þakklát fyrir að vera sú sem ég er,“ segir Vanda einlæg.
Vanda segist þakklát því að hafa alla tíð fengið að vera hún sjálf. „Það hefði verið hægt að stríða mér. Það hefði alveg verið hægt að gera grín að því að ég væri öðruvísi, ég fann ekki fyrir því. Ég fékk að vera með strákunum í fótbolta, ég fékk að vera bara á bikiníbuxunum í sundi og engum topp. Það var ekkert verið að gera neitt grín að þessu.“
Vanda átti farsælan feril sem knattspyrnukona, hún efast um að hún hefði farið sömu leið í lífinu ef fólk hefði reynt að breyta henni. „Hver væri ég í dag? Hefði ég átt þennan knattspyrnuferil? Hefði ég orðið formaður KSÍ? Hefði ég þjálfað Neista? Ég er ekki viss,“ segir Vanda sem varð árið 2001 fyrsta konan til að þjálfa karla í meistaraflokki þegar hún tók við Neista á Hofsósi.