Sara Arfaoui, eiginkona Ilkay Gundogan, leikmanns Manchester City hefur enn á ný ratað inn á forsíður breskra vefmiðla með opinberun á skoðun sinni um að í Manchesterborg sé ekki hægt að finna sómasamlegan mat og góða veitingastaði.

Ilkay gekk að eiga Söru fyrr á árinu en hann hefur verið stór hluti af áætlunum knattspyrnustjórans Pep Guardiola hjá Manchester City. En ætla má að Guardiola verði ekki ánægður með nýjustu opinberun Söru þar sem að hann á meðal annars einn veitingastað í Manchester.

Sara tjáði sig á samfélagsmiðlum í gær þar sem hún urðaði yfir ástandið í matargerð og veitingahúsa framboði Manchester. Sagði mikinn skort á ferskvöru og að helstu staðirnir einblíndu bara á að græða peninga.

Í svokölluðum spurt og svarað lið á Instagram í gær var Sara spurð að því hver uppáhalds veitingastaður hennar í Manchesterborg væri.

„Fyrirgefið mér, mér þykir það leitt að þurfa vera hreinskilin hér en enginn. Ég hef reynt svo mikið að finna góðan veitingastað en það er bara hræðilegur matur alls staðar

Ég hef ekki fundið góðan ítalskan stað, gott sushi eða bara góðan, ferskan mat neinstaðar…allstaðar bara frosið hráefni. Veitingastaðir hér einblína miklu frekar að græða peninga með drykkjum og skotum eins og næturklúbbarnir gera – það er ekki hugsað um að bera fram hágæða mat. Kannski í London en ekki í Manchester, sorrý.“

Þessi ummæli Söru fóru öfugt ofan í margan veitingahúsa gagnrýnandann. Einn af þeim, Jay Rayner segir þetta fáránlega staðhæfingu hjá Söru.

„Manchesterborg er troðfull af framúrskarandi veitingahúsum. Þetta er algjör gimsteinn til þess að fara út á lífið að snæða mat. Svona fleipur á erfðum tíma efnahagslega séð eru ekki að hjálpa þessum stöðum að ná endum saman.“