Davíð Smári Lamude nýr þjálfari Vestra í Lengjudeild karla og Hörður Snævar Jónsson íþróttastjóri Torgs voru gestir í íþróttavikunni hjá Benna Bó á Hringbraut á föstudagskvöld.
Davíð hefur síðustu ár unnið magnað starf hjá Kórdrengjum og komið liðinu upp úr neðstu deild upp í næst efstu deild. Eftir gott starf þar ákvað hann að taka skrefið til Vestra á Ísafirði.
Málefni Kjartans Henry Finnbogasonar og KR hafa átt forsíður blaðanna í vikunni. Einn dáðasti sonur KR er nú án félags eftir að KR rifti samningi hans en neitaði svo reyndar fyrir það.
„Það hefði verið hægt að höndla þetta mál í byrjun júlí, þegar KR tekur þá ákvörðun að rifta þessum samningi. Þeir vissu af þeirri klásúlu að hann þyrfti að spila undir 50 prósent af mínútum, hann var að byrja alla leiki framan af móti. Hann skoraði fjögur mörk í sjö byrjunarliðsleikjum,“ sagði Hörður Snævar.
„KR liðið var slakt og hann var ekki sá slakasti þar. Á engum tímapunkti talar þjálfarinn við hann og segir að það þurfi að taka til í bókhaldinu, formaður aðalstjórnar hefur sagt að félagið sé ekki vel statt fjárhagslega.“
Hæstráðendur KR neita svo að svara fyrir málið nú þegar Kjartan hefur sagt sína hlið.
„Rúnar Kristinsson vill ekki svara þessu, Palli formaður vill ekki. Ég held að Kjartan hefði tekið því vel því KR vildi bjóða honum nýjan samning. í byrjun júlí hefðu þeir geta selt honum það að lækka launin. Við fáum bara eina hliðina,“ sagði Hörður.
Davíð telur að KR-ingar muni á einhverjum tímapunkti tjá sig. „Það hlýtur að koma hin hliðin,“ sagði Davíð.
