Samúel Samúelsson, formaður meistaraflokksráðs Vestra, segir ÍA ekki hafa haft samband við fulltrúa Vestra varðandi þjálfara liðsins Jón Þór Hauksson. Jóhannes Karl Guðjónsson, þjálfari ÍA tók við stöðu aðstoðarlandsliðsþjálfara karlaliðs Íslands í gær og um leið fóru af stað sögusagnir um að Skagamaðurinn Jón Þór Hauksson, væri á meðal efstu manna á blaði hjá forráðamönnum ÍA.

,,ÍA hefur ekki haft samband við okkur og jafnvel þó að þeir myndu gera það tel ég að Jón Þór myndi ekki yfirgefa Vestra. Við höfum engan áhuga á því að missa hann frá okkur,“ sagði Samúel Samúelsson, formaður meistaraflokksráðs Vestra í samtali við 433.is.

Jón Þór tók við Vestra á miðju síðasta tímabili og stýrði liðinu í 5. sæti Lengjudeildarinnar auk þess sem liðið komst í undanúrslit Mjólkurbikarsins.

Mikil ánægja var með störf Jóns Þórs fyrir Vestan og í október á síðasta ári skrifaði hann undir nýjan tveggja ára samning við félagið.

Í viðtali við 433.is eftir að nýr samningur hafði verið undirritaður, hafði Jón Þór þetta að segja:

,,Mér líður hrikalega vel. Ég átti frábæra tíma með liðinu á síðasta tímabili og er mjög spenntur fyrir framhaldinu. Það er gaman að fá tækifæri til þess að halda áfram þeirri þróun sem að var hjá okkur seinnipartinn í sumar,“ sagði Jón Þór í samtali við 433.is.

Auk þess að ganga frá samningi við Jón Þór voru samningar tveggja lykilleikmanna liðsins einnig endurnýjaðir. Jón segir það hafa verið ákveðna forsendu fyrir áframhaldandi samstarfi.

,,Fyrir mig hefur það mikla þýðingu að samningar við þessa leikmenn voru endurnýjaðir. Það voru forsendur fyrir því að ég myndi halda áfram að við myndum halda þessum leikmannakjarna og geta haldið áfram að taka skref fram á við. Það hefur oft verið staðan að byggja hefur þurft upp nýtt lið tímabil eftir tímabil.“