Jamie Carragher, fyrrverandi leikmaður Liverpool og sérfræðingur á Sky Sports, skrifaði pistil í The Telegraph þar sem að hann segir að Romelu Lukaku, framherji Chelsea, sé tifandi tímasprengja innan leikmannahóps Chelsea. Hann segir framherjann lítið hafa lært síðan að hann yfirgaf herbúðir Manchester United á sínum tíma.

Lukaku gekk til liðs við Chelsea fyrir yfirstandandi tímabil fyrir rúmar 97,5 milljónir punda. Hann byrjaði tímabilið vel og það virtist sem kaupin hefðu gengið fullkomlega upp en síðan þá hefur staðan tekið stefnu til hins verra.

Hann fór í umdeilt viðtal hjá Sky Sports undir lok síðasta árs og nú hefur dregið úr markaskorun hans.

,,Þegar að Lukaku gekk til liðs við Chelsea var horft á það þannig að hann væri breyttur leikmaður og öðruvísi en hann var hjá Manchester United á sínum tíma. Núna sex mánuðum síðar er hægt að segja að svo er ekki.

Carragher segir Thomas Tuchel, knattspyrnustjóra Chelsea vera að eiga við sama leikmann og náði að láta forráðamenn Manchester United missa þolinmæðina og selja hann til Inter Milan.

,,Það er þess vegna sem ég tel það sé tifandi tímasprengja innan leikmannahóps Chelsea þar sem leikmaðurinn er farinn að missa þolinmæði gagnvart félaginu og gagnkvæmt,“ segir Carragher og vísar í viðtal sem Lukaku fór í hjá Sky Sports á Ítalíu þar sem hann nánast óskaði sér það heitast að snúa aftur til Inter Milan.

Carragher gengur jafnvel svo langt að segja að Chelsea liðið spili betur án Lukaku. ,,Raunveruleikinn er sá að liðið lítur út fyrir að ná meira flæði á boltann og vera hættulegra án hans.“

Carragher segir of snemmt að segja til um það hvort það að kaupa Lukaku hafi verið mistök hjá Chelsea. ,,En ef það verður ekki breyting á gengi Chelsea og Tuchel hættir að treysta Lukaku núna fyrir stærstu leikina í ensku úrvalsdeildinni og Meistaradeild Evrópu, þá gæti það hafa verið mistök.“