Það þykir ljóst að framherjinn Erling Braut Haaland yfirgefi Dortmund fyrir eitt af stærstu félögum Evrópu næsta sumar. Hann verður ekki ódýr.
Hinn 21 árs gamli Haaland hefur verið stórkostlegur fyrir Dortmund frá komu sinni fyrir tveimur árum síðan. Hann hefur skorað 78 mörk í 77 leikjum.
Talið er að hann verði fáanlegur á aðeins 75 milljónir evra í sumar vegna klásúlu, sem verður að teljast ódýrt fyrir hans hæfileika.
Þegar allt er tekið inn í myndina er þó ljóst að það félag sem krækir í félag þarf að vera reiðubúið til að fjárfesta góðri upphæð í hann. Marca tók saman að þegar launin í samningi hans verða tekin inn í myndina mun hann í heildina kosta um 350 milljónir evra. Þá yrðu öll ár í samningi hans tekin með í reikninginn. Það gerir um 51,5 milljarð íslenskra króna.
Haaland hefur til að mynda verið orðaður við Manchester City, Barcelona og Real Madrid.