Þremur leikjum var að ljúka í ensku úrvalsdeildinni rétt í þessu.
Newcastle tók á móti Watford og lauk leiknum með jafntefli. Saint-Maximin kom Newcastle yfir snemma í seinni hálfleik. Lengi leit út fyrir að Newcastle myndi ná mikilvægum þremur stigum en svo varð ekki þar sem Joao Pedro jafnaði metin undir lok leiksins. Newcastle er því enn í fallsæti en Watford er í 17. sæti.
Á sama tíma tók Norwich á móti Everton. Heimamenn komust yfir strax á 16. mínútu er Michael Keane varð fyrir því óláni að skora sjálfsmark. Aðeins tveimur mínútum síðar tvöfaldaði Adam Idah forystu heimamanna og þannig var staðan í hálfleik og stuðningsmenn gestanna allt annað en sáttir og blótuðu Benitez í sand og ösku. Richarlison minnkaði muninn þegar klukkustund var liðin af leiknum en lengra komust gestirnir ekki og 2-1 sigur Norwich staðreynd.
Loks tók Wolves á móti Southampton og unnu heimamenn nokkuð öruggan sigur. Raul Jimenez kom Wolves yfir undir lok fyrri hálfleiks úr vítaspyrnu og Conor Coady tvöfaldaði forystuna eftir tæpan klukkustundar leik með skalla. James Ward-Prowse minnkaði muninn fyrir gestina á 84. mínútu en það dugði skammt þar sem Adama Traoré gulltryggði sigur Wolves með marki í uppbótartíma.
Newcastle 1 – 1 Watford
1-0 Allan Saint-Maximin (´49)
1-1 Joao Pedro (´88)
Norwich 2 – 1 Everton
1-0 Michael Keane (´16)
2-0 Adam Idah (´18)
2-1 Richarlison (´60)
Wolves 3 – 1 Southampton
1-0 Raul Jiménez (´37)
2-0 Conor Coady (´59)
2-1 James Ward-Prowse (´84)
3-1 Adama Traoré (´90+1)
