Nökkvi Þeyr Þórisson leikmaður KA hefur svo sannarlega verið einn besti leikmaður Bestu deildarinnar í ár. Sóknarmaðurinn hefur skorað ellefu mörk fyrir KA og reynst félaginu ansi drjúgur.

Nökkvi sem ólst upp á Dalvík fagnar 23 ára afmæli sínu á næstu dögum en félög erlendis eru sögð hafa áhuga á honum.

Ekkert formlegt tilboð hefur hins vegar borist til KA. „Það hefur ekki komið formlegt tilboð borist okkur, bara sögusagnir hingað og þangað. Það er ekkert komið lengra en það, ef það kemur þá erum við klúbbur sem stendur ekki í vegi leikmannsins,“ segir Sævar Pétursson framkvæmdarstjóri KA við 433.is í dag.

Mikið af sögum hafa verið um erlend lið en Sævar segir það eðlilegt þegar tölurnar hjá Nökkva séu skoðaðar.

„Hann er með lygilegar hlaupatölur, við erum að tala um tölur sem eru í fimm bestu deildum Evrópu. Bæði í hraða og sprettum, við höfum aldrei séð svona tölur áður.“

„Þetta er farið að vekja athygli og það er bara eðlilegt að það komi áhugi þegar þetta er til staðar, svo mörk og stoðsendingar.“

Nökkvi er í þriðja sæti yfir markahæstu menn en hann er einu marki á eftir Ísaki Þorvaldssyni sóknarmanni Blika sem trónir á toppnum.