Fylkir var til umræðu í markaþætti Lengjudeildarinnar á Hringbraut í vikunni.
Liðið er í öðru sæti Lengjudeildar karla en hefur þó ekki verið mjög sannfærandi. Flestir bjuggust við að Fylkir færi örugglega upp í efstu deild á ný.
Fylkir vann öruggan 0-3 sigur á botnliði Þróttar Vogum í síðustu umferð. „Þrátt fyrir að hafa unnið þennan leik þurfa þeir að rífa sig í gang. Menn í Árbænum eru ekki sáttir, ég get lofað þér því,“ sagði Hrafnkell Freyr Ágústsson, sérfræðingur þáttarins.
Hrafnkell vill sjá liðið styrkja sig. „Þeir gætu þurft að skoða að fá einhverja leikmenn inn. Ég væri til að sjá kraftmikinn miðjumann sem getur brotið upp leikinn.“
Fylkir tekur á móti Þór í næsta leik Lengjudeildarinnar. Hann fer fram á morgun.