Hermann Hreiðarsson þjálfari ÍBV var til umræðu í hinu afar vinsæla hlaðvarpi sem Peter Crouch heldur út. David James var mættur til að ræða um lífið.

Crouch og James voru liðsfélagar Hermanns þegar þeir voru hjá Portsmouth en liðið vann frækinn sigur í enska bikarnum.

„Hermann er frábær einstaklingur. Hann er öðruvísi, eins og margir frá Íslandi, en ég vissi ekki að þið væruð í sambandi,“ segir Crouch um Hermann en David James og Hermann eru miklir vinir.

„Hann er brjálæðingur, en skemmtilegur brjálæðingur. Þegar hann heilsaði manni var það iðulega eins og rúbbítækling,“ sagði James.

Crouch bætti þá við.„Hann var brjálæðingur, en ég elska hann.“

„Það er prófraun að heilsa honum. Hann handleggsbraut Glen Little við það að heilsa honum að morgni til.“

David James ræddi svo um dvöl sína í Vestmannaeyjum árið 2013 þegar hann lék undir stjórn Hermanns í ÍBV.

„Hann sagði að við værum í undankeppni Meistaradeildar Evrópu sem mér fannst skemmtilegt, en um leið var þetta tækifæri að vinna aftur með Hermanni sem er frábær einstaklingur,“ segir James og heldur áfram:

„Ég komst síðar að því að það væri til meginland Íslands og að ég væri á leiðinni á eyju sem er kölluð Heimaey þegar ég var á leiðinni. Eyjan er nálægt eldfjallinu sem gaus árið 2011.“