Jack Grealish hefur ekki beint staðið undir væntingum frá því hann kom til Manchester City frá Aston Villa í sumar. Enski landsliðsmaðurinn var keyptur á 100 milljónir punda og því fylgir pressa.

Sagt er að Grealish sé nú að skrifa undir samning við Gucci um að klæðast fatnaði frá fyrirtækinu. Hann mun fá vel greitt fyrir það. Grealish er vinsæll á meðal unga fólksins og Gucci telur það gott fyrir fyrirtækið að semja við hann.

Grealish hefur reglulega sést í fötum frá Gucci en núna mun hann fá fötin frítt og fá borgað fyrir að klæðast þeim. Ekki er algengt að tískufyrirtæki semji við íþróttafólk en Grealish fær tugir milljóna á ári fyrir samninginn.

Leikmaðurinn var til umræðu í upphitunarþætti Viaplay fyrir Meistaradeild Evrópu sem nú stendur yfir. Grealish og félagar mæta Atletico Madrid í kvöld.

Kári Árnason og Rúrik Gíslason eru sérfræðingar í setti og skaut sá síðarnefndi aðeins á Grealish. ,,Hann er sennilega að skrifa undir risasamning við Gucci. Það er það besta sem hann hefur gert upp á síðkastið,“ sagði Rúrik.