Liverpool sigraði Crystal Palace 3-1 í ensku úrvalsdeildinni fyrr í dag. Liverpool spilaði vel fyrsta hálftímann en svo fór að halla undan fæti og leikmenn Crystal Palace sóttu í sig veðrið og ógnuðu vel fram á við.
Klopp var virkilega ánægður að ná þremur stigum út úr leiknum og þá sérstaklega að hafa klárað janúarmánuð á góðum nótum en nú tekur við vetrarfrí í ensku úrvalsdeildinni.
„Ég er þvílíkt ánægður. Janúar er erfiður tímapunktur fyrir okkur eða allavega fyrir mig, svo segir sagan. Við erum án þriggja leikmannna sem eru í Afríku svo það var þunnur hópur í dag en strákarnir voru ótrúlegir,“ sagði Klopp við BBC.
„Þetta sýndi hversu fáránlega góðir við getum verið og hversu slakir líka. Við vorum stórkostlegir í 35 mínútur. Palace spilaði góðan leik, við opnuðum dyrnar fyrir þeim og þeir hlupu í gegn.“
„Ég er gríðarlega ánægður með það hvernig við komumst í gegnum janúar.“