Pep Guardiola hefur mikinn áhuga á Vinicius Jr., leikmanni Real Madrid og hefur nú þegar sett sig í samband við umboðsmenn hans.

Vinicius hefur byrjað þetta tímabil af krafti en hann hefur skorað 15 mörk og gefið níu stoðsendingar það sem af er af tímabilinu. Kappinn er aðeins 21 árs gamall og búist er við að hann verði aðalmaðurinn hjá spænsku risunum næsta áratuginn.

Ferran Torres yfirgaf Manchester City á dögunum og fór til Barcelona og vill Guardiola bæta við sig sóknarmanni og telur að Vinicius sé fullkominn í það.

Vinicius er með samning við Real Madrid til 2024 en vonast eftir því að fá nýjan samning þar fljótlega með bættum kjörum. Hann hefur áður sagt það í viðtali að hans helsti draumur hafi alltaf verið að spila með Real Madrid og því gæti reynst erfitt fyrir Pep Guardiola að sannfæra leikmanninn um að koma til Manchester.