Búið er að bjóða Donny van de Beek, miðjumann Manchester United, til bæði Newcastle og Borussia Dortmund. Þetta segir í frétt Manchester Evening News.
Hinn 24 ára gamli van de Beek er algjörlega úti í kuldanum á Old Trafford. Hann kom til félagsins fyrir síðustu leiktíð.
Hollendingurinn hefur aðeins komið við sögu í 49 leikjum fyrir Man Utd. Jafnframt hefur hann aðeins leikið rúmar 37 mínútur að meðaltali í þessum leikjum.
Einhverjir héldu að van de Beek fengi fleiri tækifæri hjá Ralf Rangnick, stjóra Man Utd, eftir brottrekstur Ole Gunnar Solskjær. Svo var þó ekki.
Talið er að Man Utd vilji lána leikmanninn frekar en að selja hann. Það er spurning hvort að Newcastle eða Dortmund bíti á agnið og sæki þennan miðjumann sem átti góðu gengi að fagna hjá Ajax fyrir komuna til Manchester.