Robert Laul einn vinsælasti íþróttafréttamaður Svíþjóðar telur að IFK Gautaborg hafi höndlað málefni Kolbeins Sigþórssonar á fagmannlegan hátt. Hann segir félagið ekki hafa haft neinn rétt á því að rifta samningi íslenska framherjans.
Uppi varð fótur og fit í Svíþjóð vegna frétta á Íslandi um fjögurra ára gamalt mál Kolbeins. Kolbeinn var árið 2017 sakaður um ofbeldi, hálfu ári síðar greiddi hann miskabætur og náði sátt í málinu. Kolbeinn hafnaði þó alltaf því að hafa beitt ofbeldi.
Meira:
KSÍ gæti þurft að greiða Kolbeini miska- og fjártjónsbætur: Neita að biðjast afsökunar
Málið komst í fréttirnar í lok ágúst og var það ástæða þess að stjórn KSÍ bannaði Kolbeini að mæta í síðustu landsleiki.
„Þeir höfðu engan lagalegan rétt til þess að rifta samningi hans, þessir atburðir áttu sér stað fyrir löngu síðan. Hann var ekki leikmaður IFK Gautaborgar á þeim tíma,“ sagði Laul í hlaðvarpsþætti í Svíþjóð í gær.
Laul segir að Gautaborg hafi ekkert annað getað gert en að styðja við bak Kolbeins.
„Félagið sem vinnuveitandi hefur sína ábyrgð og samkvæmt lögum verða þeir að styðja við Kolbein í þessari stöðu. Ég tel að Gautaborg hafi tekið virkilega vel á þessu máli Kolbeins,“ sagði Laul. Sænska félagið skoðaði málið með Kolbeini og sendi frá sér yfirlýsingu í vikunni. Þar kom fram að sænska félagið styður Kolbein.
Kolbeinn er markahæsti leikmaður í sögu Íslands ásamt Eiði Smára Guðjohnsen. Hann er á leið í aðgerð á fæti og missir af næstu landsleikjum.