Aganefnd KSÍ hefur dæmt Kjartan Henry Finnbogason og Þórð Ingason í þriggja leikja bann vegna átaka í Vesturbæ á sunnudag. Hajrudin Cardaklija markmannsþjálfari Víkings fær tveggja leikja bann. KR tók á móti Víkingum á Meistaravöllum í efstu deild karla í fyrradag.. Kjartan Henry Finnbogason kom KR yfir strax á 9. mínútu með skalla eftir frábæran bolta frá Kennie Chopart.

Atli Barkarson jafnaði metin stuttu síðar með frábæru skoti. Víkingar sóttu stíft það sem eftir lifði leiks og uppskáru á 87. mínútu er Helgi Guðjónsson kom knettinum í netið.

Ótrúleg dramatík var undir lok leiks en KR fékk vítaspyrnu og þá varð allt brjálað og Kjartan Henry Finnbogason sá rautt. Pálmi Rafn tók spyrnuna en lét Ingvar Jónsson verja frá sér og mikil fagnaðarlæti brutust út hjá Víkingum enda komnir á topp deildarinnar.

Kjartan virðist á myndbandi kýla Þórð Ingason varamarkvörð Víkings og var vikið af velli en hann segist hafa ætlað að hrinda Þórði.