Hannes Þór Halldórsson er hættur með landsliðinu, þessi magnaði markvörður lék sinn síðasta landsleik gegn Þýskalandi á miðvikudag.
Hannes hefur spilað með landsliðinu í tíu ár og er að margra mati besti markvörður í sögu Íslands. Hann birti í gær myndir á Facebook síðu sinni þar sem hann sést ræða við Manuel Neuer, markvörð Þýskalands. Eldri börn Hannesar standa þar með honum og drengurinn ungi horfir stjarfur á Neuer.
„Stákurinn veit allt um markvörslu og Manuel Neuer, þetta var mjög stór stund fyrir hann. Hann kom heim um kvöldið og var hugsi, ´Pabbi ef Manuel Neuer er yngri en þú, hvernig er hann miklu betri í marki en þú?´. Hann er fimm ára, eins og staðan er núna þá nánast sefur hann með markmannshanskana. Hann er að æfa sig endalaust, það er eitthvað í honum,“ sagði Hannes í Bítinu á Bylgjunni í morgun.
Hannes útskýrði svo ákvörðun sína að hætta með landsliðinu á þessum tímapunkti. „Ég tók þessa ákvörðun, það var margt við það. Ég er búin að vera í tíu ár í landsliðinu, ég spilaði fyrsta landsleikinn í september árið 2011. Síðan hefur þetta verið að gerast, við duttum út í umspili á EM á hræðilegan hátt síðasta haust. Ég ætlaði að fara á EM og kalla þetta gott, á Wembley hélt ég að þetta væri komið. Riðlarnir voru dregnir og okkur fannst það raunhæfur möguleiki að fara á eitt stórmót í viðbót, það var ekkert annað en að taka slaginn. Það er fullt af frábærum markvörðum í liðinu, maður skynjar að tíminn sé kominn á þetta. Það er fínt að taka ákvörðun og eyða allri óvissu,“ sagði Hannes en íslenska landsliðinu hefur ekki vegnað vel í undankeppni HM.
„Þetta var rétt ákvörðun, það er ekki langt eftir af riðlinum en síðustu leikirnir eru spilaðir í nóvember og mótið okkar klárast eftir nokkrar vikur. Mér fannst þetta rétti tímapunkturinn til að segja bless, gegn best markverði í heimi,“ sagði Hannes sem spilar með Val í efstu deild karla.
Hannes er sáttur með ákvörðunina þó söknuður geri vart við sig. „Maður finnur það núna, þrátt fyrir að ég sé ánægður með ákvörðunina. Þetta hefur verið stór hluti af manni í tíu ár, það örlar á söknuði en það er partur af þessu ferli. Ég er búin að upplifa miklu meira en ég hafði látið mig dreyma um, þetta var mjög auðveld ákvörðun. Þetta er búið að vera one hell of a ride.“
„Ég er ekki hættur, ég á eitt ár eftir í Val. Það er talað eins og þetta sé búið, nánast eins og maður sé farin yfir móðina miklu. Ég er enn fótboltamaður, tímabilið ekki búið með Val og eitt ár eftir. Síðan sjáum við hvað gerðist,“ sagði Hannes á Bylgjunni.
