Hörður Snævar Jónsson sagði í hlaðvarpsþættinum Dr. Football í dag að það muni setja aukna pressu á Frey Alexandersson, þjálfara Lyngby, að fá Sævar Atla Magnússon til félagsins.
Sævar Atli er talinn við það að ganga í raðir danska B-deildarliðsins frá Leikni Reykjavík.
Hjörvar Hafliðason, þáttastjórnandi, velti því upp hvort að það myndi setja aukna pressu á íslenska þjálfara að sækja íslenska leikmenn í erlend lið.
,,Þetta er hættulegur leikur. Ef Sævar Atli kemur þarna og gerir ekki neitt þá horfa stjórnarmenn Lyngby á það að hann hafi farið þarna heim til sín og sótt leikmann sem engu skilar. Það er bæði pressa á Sævari og Freysa að þetta gangi upp,“ sagði Hörður.
Sævar Atli er aðeins 21 árs gamall. Hörður telur það geta hjálpað honum í í byrjun hjá Lyngby.
,,Kannski hjálpar það Sævari að vera svona ungur. Hann fær kannski eitt ár til að aðlagast.“