Gary Martin hefur staðið sig mjög vel með nýliðum Selfyssinga í Lengjudeild karla í ár. Framherjinn er kominn með 8 mörk í 16 leikjum. Englendingurinn var til umræðu í Markaþætti Lengjudeildarinnar á Hringbraut á mánudag.

Selfoss er í tíunda sæti deildarinnar með 15 stig, 5 stigum fyrir ofan fallsæti þegar sex umferðir eru eftir. Gary er stór ástæða þess að staða liðsins í fallbaráttunni lítur eins vel út og raun ber vitni.

Í síðasta leik gegn Grindavík skoraði Gary tvö mörk og lagði upp annað í mikilvægum 3-2 sigri.

,,Mér finnst hann bara vera að taka þetta fyrirliðahlutverk með trompi hjá þeim. Hvernig hann er byrjaður að spila sem liðsmaður, eins og þú sérð í þriðja markinu. Það hefði verið auðvelt að fara sjálfur og klára leikinn. Hann gerir hrikalega vel, bíður eftir Þór, sendir sendinguna á hárréttum tíma og Þór klárar það. Mjög vel gert. Maður sér það líka bara að það er meiri jákvæðni yfir honum,“ sagði Hrafnkell Freyr Ágústsson, sérfræðingur þáttarins.

,,Gary að stíga heldur betur vel inn í þetta hjá Selfossi og verður kannski ástæða þess að liðið heldur sér í Lengjudeildinni,“ bætti Hörður Snævar Jónsson, þáttastjórnandi, við.

Hér fyrir neðan má sjá umræðuna um Gary Martin, sem og Markaþátt Lengjudeildarinnar í heild sinni.