Danski markvörðurinn Lukas Jensen kom sterkur inn í lið Kórdrengja á fyrri hluta leiktíðar í Lengjudeildinni. Hann var hjá liðinu á láni frá enska úrvalsdeildarfélaginu Burnley. Nú er hann snúinn aftur til Englands. Rætt var um markvörðinn og það skarð sem hann skilur eftir sig í markaþætti Lengjudeildarinnar á Hringbraut í gær.
,,Það hefði nánast hvaða markvörður sem er á Íslandi verið í vandræðum með að fylla í hans skarð,“ sagði Hörður Snævar Jónsson, þáttastjórnandi, um Jensen.
Hrafnkell Freyr Ágústsson, sérfræðingur í þættinum, tók í svipaðan streng.
,,Hann gefur þeim bara svo hrikalega mikið. Þeir geta lagst til baka og hann getur komið og rifið allar fyrirgjafir og sendingar inn í.“
Hinn 19 ára gamli Sindri Snær Vilhjálmsson hefur fengið það verkefni að fylla í skarð Jensen í marki Kórdrengja.
Hér fyrir neðan má sjá umræðuna um Jensen sem og markaþátt Lengjudeildarinnar í heild sinni.