Þjóðskrá Íslands hefur hafnað beiðni Sigurðar Gísla Snorrasonar, oft kallaður Siggi Bond, um að fá að bæta ,,Bond“ við nafnið sitt.
Sigurður er leikmaður Þróttar í Vogum í 2.deild karla. Þá er hann einnig meðlimur í hlaðvarpsþættinum The Mike Show.
Sigurður vildi formlega fá að heita Sigurður Gísli Bond Snorrason.
,,Eiginnafnið Bond er ekki á mannanafnaskrá. Skilyrði upptöku nýs nafns er að það hafi verið samþykkt af mannanafnanefnd, sbr. 5. mgr. 13. greinar Mannanafnalaga. Stofnunin getur því ekki orðið við beiðni mannsins að svo stöddu,“ stóð meðal annars í beiðni um úrskurð eiginnafnsins frá Þjóðskrá Íslands. Beiðnina má sjá í heild neðst í fréttinni. Þar kom þó einnig fram að eiginnafninu Bond yrði nú skotið til úrskurðar mannanafnanefndar.
Sigurður var afar ósáttur með bréfið frá þjóðskrá. ,,Nú treysti ég á að þessi brandarastofnun leggist niður og það í hvelli,“ skrifaði hann á Twitter.
