Meiðsli áttu stóran þátt í því að Liverpool tókst ekki að verja titilinn á síðustu leiktíð. Varnarmennirnir Virgil van Dijk, Joe Gomez og Joel Matip voru frá bróðurpart tímabils. Klopp þurfti að grípa til örþrifaráða og tefldi á köflum fram Jordan Henderson og Fabinho í miðverðinum. Það eru engin meiðsli innan herbúða Liverpool um þessar og Klopp hefur þegar fengið liðsstyrk í sumarglugganum.

Það verða því bæði ný og kunnnugleg andlit í byrjunarliðinu. Alisson er einn besti markvörður ensku úrvalsdeildarinnar og verður áfram á milli stanganna. Alexander-Arnold og Andy Robertson eru líklegir til að vera áfram í bakvarðarstöðunum, og Virgil van Dijk sem er að koma til baka úr meiðslum og Ibrahima Konte, sem Liverpool fékk á 36 milljónir punda frá RB Leipzig í sumar verða að teljast firnasterkt miðvarðarpar.

Fabinho er mikilvægur hlekkur á miðjunni og Thiago, sem átti erfitt uppdráttar í fyrra mun berjast um sæti sitt í liðinu við hlið hans. Jordan Henderson er augljósasti kosturinn til að fullkomna þrenninguna en hann hefur verið orðaður við önnur félög í sumar. Fyrirliðinn hefur ekki skrifað undir nýjan samning við Liverpool og gæti verið seldur til Atletico Madrid, Saul Niguez, leikmaður Atletico færi þá í hina áttina. Þá væri Saul á miðjunni með Fabinho og Thiago í stað Henderson.

Mohamed Salah og Sadio Mane eru byrjunarliðsmenn í framlínunni ásamt Roberto Firmino. Diogo Jota mun einnig koma við sögu en hann átti frábæra innkomu í Liverpool í fyrra.

Mögulegt byrjunarlið Liverpool á næsta tímabili: Alisson, Alexander-Arnold, Van Dijk, Konate, Robertson, Fabinho, Thiago, Saul, Mane, Salah, Firmino.