Samkvæmt spænska blaðinu Marca ætlar Kylian Mbappe að fara frítt frá Paris Saint-Germain þegar samningur hans rennur út næsta sumar. Þá kemur einnig fram í frétt blaðsins að leikmaðurinn vilji ganga til liðs við Real Madrid.
Hinn 22 ára gamli Mbappe hefur verið stórkostlegur fyrir PSG frá því hann kom til liðsins frá AS Monaco árið 2017. Hann hefur skorað 132 mörk í 171 leik.
Mbappe hefur reglulega verið orðaður við önnur félög, þá sérstaklega Real Madrid. Hann hefur þá einnig verið orðaður við Liverpool. Samkvæmt frétt Marca mun hann þó velja spænsku höfuðborgina frekar.
Mbappe kostaði PSG um 145 milljónir evra, ásamt árangurstengdum greiðslum, er hann kom til félagsins. Það yrði því slæmt fyrir franska stórveldið að missa hann frítt næsta sumar.