Samkvæmt breska götublaðinu The Sun harðneitar Gylfi Þór Sigurðsson öllum ásökunum sem að honum hefur verið beint. Þetta kemur fram í frétt blaðsins um málið.
Um helgina var greint frá því að leikmaður í ensku deildinni hefði verið handtekinn vegna gruns um brot gegn barni. Skömmu síðar var greint frá því að leikmaðurinn sem um ræðir væri 31 árs gamall og í Everton og í gær greindu svo íslenskir fjölmiðlar frá því að leikmaðurinn sem um ræddi væri Gylfi.
Mikið hefur verið fjallað um málið í fjölmiðlum á meginlandinu, sérstaklega á Englandi, en þó hefur Gylfi ekki verið nafngreindur þar af lagalegum ástæðum.
Þó hefur til dæmis The Sun gengið afar langt í því að teygja sig yfir línuna með því að birta frétt um að Fabian Delph sé ekki leikmaðurinn sem um ræðir. Delph var eini leikmaðurinn sem er líka 31 árs og er í Everton. Þeir lesendur The Sun sem kunna að lesa milli línanna geta því séð að Gylfi er leikmaðurinn sem um ræðir.
„Leikmaðurinn getur ekki verið nafngreindur af lagalegum ástæðum – þrátt fyrir það hefur hann verið nafngreindur í heimalandi sínu og í alþjóðlegum fjölmiðlum,“ segir í frétt The Sun. Þá kemur einnig fram að Gylfi hafi víst neitað sökað í málinu. „Hann er sagður harðneita öllum ásökunum gegn sér en hann hefur þegar misst samstarfssamning,“ segir í frétt The Sun um málið.
