Ragnar Sigurðsson, landsliðsmaður í fótbolta er orðinn leikmaður Fylkis. Þetta kemur fram í tilkynningu frá félaginu.
Ragnar er uppalinn í Fylki og spilaði með meistaraflokk liðsins árin 2004-2006 en þá var hann seldur til Gautaborgar. Ferill Ragnars hefur verið skrautlegur en hann hefur einnig spilað í Rússlandi, Englandi og í Danmörku en Kaupmannahafnarbúar halda mikið upp á Ragnar. Það eru fáir íbúar þar sem kannast ekki við kauða.
Ragnar spilaði seinast með FC Rukh Lviv í Úkraínu en hann spilaði aðeins einn leik fyrir félagið. Ragnar hefur spilað 97 landsleiki fyrir Ísland og skorað í þeim fimm mörk. Meðal annars skoraði hann eitt marka Íslands á móti Englandi á Evrópumótinu í Frakklandi árið 2016.