Það gæti skollið á milliríkjadeila nú þegar Noregur reynir að klófesta eina efnilegustu knattspyrnukonu sem Ísland á. Um er að ræða mál Amöndu Andradóttur sem er 17 ára gömul og leikur með Valerenga í norsku úrvalsdeildinni. Amanda er 17 ára gömul og er gríðarlega efnileg. Hún á norska móður og íslenskan föður og getur því valið á milli landsliðanna. Hún hefur spilað með yngri landsliðum Íslands en var á dögunum valin í æfingahóp norska U19 landsliðsins.
Það yrði högg fyrir Ísland að missa af Amöndu til Noregs en sú staða gæti komið upp í haust að hún fái kallið frá öðru landsliðinu, ef ekki báðum. Um leið og hún spilar keppnisleik fyrir A-landslið er ekki aftur snúið.
„Leikmaðurinn sem er ekki valinn, stelur fyrirsögnum,“ sagði Benedikt Bóas í sjónvarpsþætti 433.is í gær á Hringbraut.
Hörður Snævar Jónsson stjórnandi þáttarins sagði að milliríkjadeila gæti verið í aðsigi. „Spilar í norsku úrvalsdeildinni, stefnir í milliríkjadeilu nú þegar Norðmenn eru farnir að velja hana í yngri landslið sín. Þorsteinn kemur fram og segist hafa átt samtal við hana. Samtalið átti sér ekki stað eða hvað?.“
Það vakti athygli fyrir helgi þegar Ríkharð Óskar Guðnason íþróttafréttamaður sagði að Þorsteinn Halldórsson hefði ekki farið með rétt mál, Þorsteinn hafði átt samskipti við Amöndu og hennar aðila í mars en ræddi ekki við hana fyrir núverandi verkefni. . ,,Samkvæmt mínu, sem ég hef heyrt, hefur KSÍ ekki haft samband við Amöndu. Hvorki fyrir þetta verkefni, sem er núna framundan, hvorki vegna U-19 eða A. Ekki heldur eftir að kom í ljós að hún var valin í norska liðið. KSÍ tjékkuðu ekki einu sinni hvort að hún væri með mótefni eða bólusett og myndi þá sleppa við sóttkví og gæti mögulega tekið þátt í verkefnunum. Þeir gefa sér það í rauninni bara. Það eru engin samskipti og hafa ekki verið nein samskipti á milli KSÍ og Amöndu,“ sagði Ríkharð í hlaðvarpsþættinum The Mike Show
Benedikt ætlar ekki að taka afstöðu í því máli en segir. „Rikki G segir að samtalið hafi aldrei farið fram, ég kýs að trúa engu. Rikki G er ekki umdeildur maður, hann hefur ekki miklar og sterkar skoðanir. Að hann segi eitthvað svona er áhugavert, mér finnst þetta áhugavert.“