Keflavík og Heerenveen hafa náð samkomulagi um sölu á Birni Boga Guðnasyni! Hinn 17 ára gamli framherji Björn Bogi Guðnason hefur verið seldur til Hollenska stórliðsins Heerenveen sem spilar í efstu deild þar í landi.
Björn Bogi kom inní lið Keflavíkur á seinustu leiktíð og lék 4 leiki í Lengjudeildinni en var síðan lánaður til Víðis seinni hluta sumarsins. Björn Bogi kemur úr yngriflokka starfi Keflavíkur og Víðis.
„Björn er ungur og mjög spennandi leikmaður sem á framtíðina fyrir sér. Hann heldur til Hollands um miðjan júní og mun þar hefja nýjan kafla með nýju liði. Við erum öll gífurlega stolt af Birni og viljum óska honum alls hins besta ytra og vonum auðvitað að kauði springi út og sanni hvað í honum býr. Við viljum óska Birni og fjölskyldu hans innilega til hamingju með þennan merka áfanga!,“ segir á vef Keflavíkur.
Fyrir nokkrum árum fór ungur Björn í viðtal við Víkurfréttir og ræddi um sína uppáhalds fótboltamenn. „Neymar, Ronaldo, Mbappe og Jóhann Berg,“ sagði Björn en Jóhann Berg sem leikur með Burnley í dag fór fyrst til Hollands þegar hann gerðist atvinnumaður.
Jóhann var þá 18 ára gamall þegar hann samdi við AZ Alkmaar en Björn er kantmaður líkt og Jóhann Berg.